GABADHII BAARAN JIRTAY JEEBKA NINKEEDA IYO ARRINTA AY MAALINTII DAMBE KALA KULANTAY

Gabar xaas ah ayaa hadda ka hor waxaa ay mar walba baaran jirtay jeebabka ninkeeda. Wax kale ka ma aysan baari jirin e, maaddaama uu ahaa nin lacag jeebka isaga qaata, lacagta ay ka hesho jeebkiisa ayey wax uun ka goosan jirtay isaga oo aan ogeyn, isna, in kasta oo aysan tebiddiisu badnayn, laakiin haddii uu maalin wax uun dareemo, meel uu u saariyo inta uu aqoon waayo, ayaa in uu isagu isticmaalay u la ekaan jirtay laakiin uu illowsan yahay ama ay meel uga dhuntay.

Sidii ay aroor walba u baaran jirtay jeebkiisa ayey maalintii dambe waxa ay ka heshay nuqulka warqad furriin ah oo uu siiyey gabar uu hoos u qabi jiray oo ay isfahmi waayeen.  Say te, ‘Waaw’.

Maantaas, iyana xog bay heshay, isna tuuggii jeebsiibi jiray ayuu helay!

Waxaa Qoray: Suldaan Nayruus          
Kala xiriir: nayruus@gmail.com          
Fb page: www.facebook.com/snayruus

GAARI AAN ISKA DHAAFAY IN AAN RAACO IYO SABABTII ARRINTAAS KEENTAY

In aan iska lugeeyo waa caadadayda e, shalay ayaa aniga oo laamiga iska dhinac socda, waxa aan arkay gaari nooca raaxada ah oo wiil dhallinyaro ah uu watay oo tartiib u socday. Wiilkii isha inta uu iga qaaday ayaan arkay isaga oo si uun ii soo eegaya. Meesha aan u socdo oo dheereyd iyo qorraxada oo kululayd iyo wiilka oo aan beerjileec ka dareemay, waxaa niyaddayda soo gashay in aan istaajiyo oo aan dhaho: Walaalo horay ii sii dhawee. Waan la hadlay. Waxba ima weydiine, daaqadda inta ii furay ayuu yiri, “Soo gal saaxiib.” Isla markiiba inta maskaxdaydii sidii Kombiyuutarkii u shaqeysay oo xasuuso hore gashay ayey ii soo gudbisay farriin ahayd, “Ha raacine iska fasax.” Maskaxdayda waan ka dambeeyaaye, inta aan daaqaddii u xiray oo aan u mahadceliyey ayaan iska fasaxay. Wiilkii oo shaki galay ayaa iska sii socday oo gabar iyana sidaas oo kale laamiga lugaynaysay horay u sii qaaday.

MAXAY AHAYD FARRIINTA MASKAXDAYDU SOO GUDBISAY OO GAARIGA IGA CELISAY?

Waayadii 2012 dii ilaa 2014 tii, waxaa magaalada Muqdisho ku soo badanayey gawaarida raaxada oo si is dabajoog ah Dekadda Muqdisho uga soo degayey. Arrintaas waxaa sabab u ahaa laamiyada cusub ee magaalada laga dhisayey. Waxaa aad u soo badanayey dhallinyarada baabuurta laamiyada kula xawaaraynaysay oo qofkii lugaynaya oo joogsada inta u istaaga, meesha uu rabo geynaysay. Iyagu dadkaas uma daynaynayne, baabuur ku mushaaxaas baa dan u ahaa iyo hadba meel tegiddaas. Kolkaas baa waxaa batay dad heeraha laamiga iska tuban oo aan baas raacayn oo wada lifti doon ah oo meesha u taaagan wiil baabuur raaxo la xiimaya.

Maalin maalmaha ka mid ah ayaa oday u bartay raaraacidda baabuurta dhallinyarada oo laami u taagnaa in u helo baabuur raaxo oo sii dhaweeya, waxaa uu arkay baabuur Kaarib ah oo qurux badan oo wiil dhallinyaro ah uu wato. Gacanta ayuu u taagtay. Waa uu istaagay. Waa uu raacay. Wiilka baabuurka watay waxaa uu ahaa wiil nafti hure ah, isaga iyo gaarigana qarax ay ka dhaansanaayeen, waxaa uu na u socday bar loogu talagalay in uu isku qarxiyo. Wiilku, maadaama uu aaminsanaa in uu janno u socdo, waxaa is kula taliyey in uusan odaygan xaasidin oo uu jannada u wado. Sidaas buu yeelay oo, markii uu gaaray halkii lagu ballamay ayuu isqarxiyey, odaygiina halkii buu ku googo’ay.

Wixii dhacdadaas ka dambeeyey, umaddii basaskoodii iyo lugtoodii ayey iska iimaansadeen.

Farriintaas ayaa ii diidday raacidda gaarigaas.

Taladii Maskaxda: Suldaan Nayruus      
Email: nayruus@gmail.com           
FB Page: www.facebook.com/snayruus