MAXAAD KA TAQAANNAA MASDIL AMA MAFOOFE?

Masdil ama Mafoofe, waxaa la yiraahdaa ninka aan shaqo iyo waxbarasho tegin ee xaafadda iska jooga. Raggu, marka ay subixii kallahaaan; kii waxbarasho aadaya iyo kii hawl u kacayaba, isagu, inta barqodheer soo kaco, ayuu caday jardiinka la fariistaa isaga oo qaba macawis gaaban oo aysan waxba uga hooseyn iyo garan. Rummaygu ma ahan kii daqiiqado ku dhammaan jiray, ilaa saacado ayuu iska cadaysanayaa. Dumarka deriska ah ee adeegdoonka ah ayuu midka kasta salaam iyo xaalwareysi u galaa.

Xaafadda, gurigii bahal yar lagu dhex arko oo ay haweenku ka baqaan, isaga ayaa loogu yeeraa, maaddaama wax rag ah uu isagu aagga ka joogo. Markaas buu bud inta soo qaato, bahalkaas dilaa. Hadhawto, marka odaygii reerka lahaa yimaado ayey islaanta iyo carruurtu u sheegaan in maanta bahal uu guriga ka soo dhexbaxay, oo abti ‘Hebel’ dilay. Waa sababta loogu bixiyey Masdil. Goballada qaar baa looga yaqaan ‘Mafoofe’ maadaama uusan nawaaxiga ka bixin. Labadan magac baa ugu caansan, laakiin meelo kale ayaa looga yaqaan “Naagoshaneeye’. Meelo kalana, waxaa ba looga yaqaan magac wanaagsan oo ah ‘Caawiye’.

Masdilku, shaqooyin badan ayuu xaafadaha u qabtaa. Wixii bahallo ah oo dumarku ka baqaan waa ka dilaa. Wixii guryaha ka halaabba oo uu qaban karo isaga ayaa qabta, sida: daahyada oo uu xiro, nalalka hallaaba oo uu beddelo, qasabadaha oo uu furo iyo adeegayada yaryarka oo uu bannaanka ugu doono. Wixii uusan qaban karinna, isaga ayaa reerka ugu waca qof qaban kara. Waxaa intaas ka muhiimsan oo uu qabtaa, waxa uu raggooda ku simaa dumarka qaarkood, gaar ahaan kuwa aan raggooda imaan ku qabin iyo kuwa naagaha kale lala qabo ee masayrsan, oo habeenka laga maqan yahay, ku xumee darteed, Masdil ku casuuma. Wixii garoob ah oo Shaydaan walaaqayo isaga ayaa u maciina inta ay nin ka helayaaan. Gabdhaha yaryar isaga ayaa, intooda badan, soo af iyo jara bara.

QISADII UGU YAABKA BADNAYD

Xafaad ka mid ah degmo ka mid ah Muqdisho, ayaa waxaa lagu arkay 5 carruur ah oo isku eg oo shan qoys oo deris ah kala dhaleen. Waxaa irkig noqotay in ay 5 tabu u eg yihiin Masdil xaafadda caan ka ah. Arrintaa ayaa amakaag iyo mucjiso afaf la marooreen. Shantii reer waa isaga guureen xaafaddii.

REERGUURAAGA IYO MASDIL

Dadka aan lahayn guryo ee hadba xaafad dega, kuwooda yaqaan Masdilka, inta aysan u guurin xaafadda, waxa ay soo xansadaan meelaha. Haddii uu Masdilku ku badan yaahay, ma degaan xaafaddaas, si` kasta oo ay u fiican tahay. Dadka aan waxba ka aqoon Masdilna, waa iska degaan xaafad kasta oo ay guri ka helaan, kolkaas baa waxaa laga yaabaa in ay dhex galaan xaafad Masdilyadu ay ku badna yihiin, oo markaasi nimanku ay maqalkoodu ku bataan, ‘Hebel’ ama ‘Abti Hebel’ baa naga caawiyey arrintaas iyo arrintaas.

FG: Haddii aadan horay u la socon Masdil oo uu casharkani ku anfacay, hadda ka dib ku talagal. Fadlan, la sii wadaag saaxiibbada aad jeceshay in ay ka warhayaan Masdilka.

U-kuurgeliddii:      Suldaan Nayruus      
Email:                       nayruus@gmail.com  
Fb page:                   www.facebook.com/snayruus